عيد الام..او الاسرة
وات ايفر
الكل في التليفزيون سعيد و مبسوط و الكل شغال علي اغنية..ست الحبايب يا حنانة انت( علي رأي الليمبي)
كبرت دماغي و طفيت التليفزيون خالص و هربت من امبراطورية ميم و عالم عيال عيال و بدأت يومي بقناة المجد و العفاسي و خرجت طول اليوم برة و حتي ماما كلمتها بعجالة شديدة و قلتلها كل سنة و انت طيبة بمناسبة المولد النبوي مش عيد الام
يا ناس حرام عليكم اعملوا حساب الناس اللي امهتها بغيدة عنها آلاف الاميال الجوية(زيي) طيب بلاش دي اعملوا حساب الناس اللي امهاتها اتوفت..لا بلاش دي علشان قلنا الكلام ده من زمان فقلبتوها عيد الاسرة..طيب اللقطاء ولا الايتام اللي ولا ليهم لا اسرة و لا اهل ايه لزوم اننا نخلص عليهم بالكلام ده
صحيح انا واحدة من الناس اللي ان شاء الله حتستفيد من العيد ده بعد سنتين او تلاتة ( ايوة يكون ابني دخل المدرسة و استوعب ياخد الفلوس يحوشها علشان يجيبلي هدية) عو انا مثلا مخلفاه شفقة لا طيعا علشان يخدمني في الاوقات اللي زي دي اهو ينفع برده
لكن بجد حرام عليكم اللي بتعمله في الناس
يعني والدتي بتعيط علي مامتها اللي ماتت من 3 سنين
والدي بيعيط علي والدته اللي ماتت من 16 سنة و اقوله بتعيط علي تيتة يا بابا يقولي لأ ده انا بس افتكرتها لما كانت بتعيط علي مامتها قبل متتوفي بشهرين و أسأله ياه اكيد كانت مامتها ممتازة و ربتها تربية ممتازة علشان كدة بتعيط عليها يقولي لأ هي اصلا ماتت و هي بتولدها بس يعني بتعيط علشان عاشت حياتها منغير ام فبتفتكر باباها و تعيط عليه هو كمان
ااااه يا نفوخي ياني
طيب بلاش دول
لما الراجل اللي عنده 65 سنة يعيط علي امه اللي ماتت من 27 سنة تقوله فيها ايه دي...(مين الراجل ده؟؟..) بلاش تعرفوا علشان مش بحب اجيب في سيرة الناس
يانااااااااس فوقوا بقي الناس فس فلسطين متبهدلة و في العراق طالع عينها و جوة و برة طلوع عين كمان مش هاين عليكم تفرحونا عاملنلنا عيد تكأبونا فيه
اقول فيكم ايه بس
حسبي الله و نعم الوكيل
الاشتراك في:
تعليقات الرسالة (Atom)
هناك ١٦ تعليقًا:
السلام عليكم
انت ايه اللى مضايقك مخليهم يحتفلوا ياريت يعملوا ا عيد الجعانين وياكلو اللى مش لاقيين ياكلوا وشكرا
سيادة الرئيسة
اديكي قلتيها بنفسك
يعملوا عيد للجعانين و يأكلوا فيها كل جعان دي ممكن
و من فضل ربنا و نعمته علينا عيد الاضحي اللي الغلابة بيشوفوا فيه اللحمة اللي بيقعدوا طول السنة يسمعوا عنها
طيب اخترعولنا عيد الام
حيحسنوا نفسيتنا ازاي فيها حيركبوا ام لكل واحد فينا؟؟؟؟؟؟؟؟؟؟
ضحكتينى أوى اليوم دة بقى فعلا يوم مأساوى مش عيد أبدا0
أسفه لم أقرأ موضوعك لكن أمامي مهمة نشر مدونه في غاية الاهميه أنشرها بين المدونين ان استطعت
ادعوكم لزيارة هذه المدونه
http://www.ta7arosh.blogspot.com/
زوجة عاشقة بصراحة انا زرت مدونتك لكن انتي طلعتي احسن مني و سيبتي تعليق
لكن انا كل ما اجي اكتب تعليق اقف يمكن لأنك قلتي كل الكلام و يمكن لأني زييك زوجة عاشقة
اسعدتني زيارتك و الحمدلله انك ضحكتي علشان اكسر موود الكآبة اللي اشتعرت بيه
ماما كانت بتعمل زيك كده
و دايمة كانت تقول ان عيد الام بدعة و محدش يجيب حاجة فيه ولا حتي كل سنة و انت طيبة
و بعدين
اظاهر غيرة ولا ايه؟؟
مرة واحدة بقت بتزعل لما منعبرهاش شهر مارس بالتهنئة
و بعدين تطور الامر الي هدية
بس طلاما هي مبسوطة خلاص
و ربنا يقرب البعيد
و يجمع بينك و بين امك في الدنيا
و في الفردوس الاعلي ان شاء الله
الاعياد المخترعة مش ممكن يتفق عليها كل الناس علشان كدة ممكن كل واحد يكون عنده اعياده الخاصة وما يلزمش الاخرين بيها
فيه ناس بتضحك في عيد الام وفي ناس بتبكي
لكن كلهم بيفتكروا الام وده بحد ذاته مهم سواء كان مفرح او محزن
الكآبة ضرورية في حياتنا
تحياتي
miss dot
اسعدني جدا زيارة كمدونتك الجرئية
و ان شاء الله حتلاقي فيها تفاعل قريب
موني
و الله يا بنتي من قبل مسافر و اسيب ماما و انا اصلا كل مسمع اغاني الام اعيط ليه؟ (مش بقولكم كئيبة)
بس و الله كل اغاني الام اتعملت بالحان تقطع القلب كمان لما بيكون حوالياو احدة والدتها متوفية بتقطع قلبك زيادة
ثم هو لازم عيد الام علشان تفتكروا ماما بهدية مهو لازن كل فترة تجيبي حاجة لطيفة كدة لماما ازازة برفان صغيرة ولا علبة كريم لطيقة و شيك الحاجات دي كانت بتعجب ماما جدا(و مازالت) لدرجة انها كانت بتشيلها في شنكتها و مبتورهاش لحد و اعتقد انها لو طالت تشيلها في قلبها كانت عملتها
ربنا يخليلكم مامتكم و زردوا في الهدايا شوية ميصحش كدة
يونيك
بعد طول غياب شرفتيني مرة تانية
صحيح الاعياد المخترعة عليها خلاف
بس صدقيني لا اللي عنده ام ولا اللي معدنوش بيفرحوا فيها ثم الاكتئاب مهواش ضروري في حياتنا ولا حاجة مش كفاية العيشة و اللي عيشنا يجيبوا اكتئاب بيور
دول زي ميكونوا اصدين ينكدوا عيشتنا
يدليل ان كل القنوات بتتعمد تجيب في اليوم ده دور المسنين و الاهالي المرمية هناك و عياط و دعاء علي الاولاد و بهدلة هم أصدين يختقونا و يكأبونا
اسعدني مرورك و يارب دايما اشوفك
والله يابنتى عندك حق
هى البلد ناقصه
هوا احنا كده نيجى ف الهايفة ونتصدر
حياتى قنبلة ذرية
ومن اجل الناس المتبهدله فى فلسطين
او العراق
ادعوك زيارة مدونتى ونشر البوست الاخير
لدعم هؤلاء المقهورين وياريت بين المدونات
الاجنبية
كل الشكر لك وفى انتظارك
السلام عليكم ورحمة الله وبركاته
لا أتفق معكِ في رأيك
فلا يمنع أن نجتمع بشكل سنوي في احتفال عائلي كبير للعائلة للأحتفال بأمهات العائلة وفي نفس الوقت أحس بألم الناس بأني أخصص جزء من اليوم للأيتام مثلا أو حتى بيوت المسنات وبكدة أعمل تكافل أجتماعي يعني مفيش مانع احس باللي بيشاركني في الأرض لكن ده مش معناه أني احرم اللى عايش من فرحته .
وقيسي على كدة لما مثلا واحد عنده المقدرة المادية انه يعيش مستوى مرتاح بدون تبذير طبعا تلاقي اللى يقوله انت مش حاسس باللي مش لاقي ياكل !!
الجملة تكون لها معناها لو في اسراف لكن لو في اعتدال واستمتاع بما احله ربنا يبقى ايه المانع وفي نفس الوقت احس باللى اقل مني واحاول اساعده
والموضوع وجهات نظر طبعا :)
في رعاية الله
مطلوبة عندي في تاج ... والتاج علينا حق
العزيزة جيهان
بالتأكيد لكل واحد فينا و جهة نظر بس بجد ناس كتيرة جدا بتتألم بسبب الاعياد دي
و كنت حموت لو مكتبتش عنها
سعيدة جدا بمرورك العطر
ام احمد
ربنا يسامحك يارب
أصبت الهدف والله
تفكير عقلاني
ناهيك عن حرمة عيد الأم
وأحزان الأمة التي علت فوق تلك ال....شكليات
:)
إرسال تعليق